全家啱食：
梅小惠姐手姐腳切肥膏
自從近距離望過牛一眼之後，梅小惠發誓今生不食牛：「正宗『牛咁眼』，『啤』住你，成隻人眼咁樣，好有靈性，所以我唔食牛，改食羊。」說穿了，其實羊肉質感好、脂肪低，多吃也不致肥：「我認我為食，但為食都要顧及健康。」噢！差點忘了，小惠可是N年前的健美小姐。
記者：陳漢榮
攝影：陳智良
小惠喜愛西餐，原因簡單，貪其賣相討好：「大大隻碟，又有伴菜又要淋汁，砌到靚一靚先擺上枱，睇賣相都開胃喇。」單說羊，她寧取西式燒羊扒，也不愛中式羊腩煲：「唔係話羊腩煲唔好食，不過汁同肉撈埋一煲，亂晒龍，睇落感覺比較寡，煮法、味道變化亦唔大。」閒時在家，她會煮西餐過過口癮，當然，以方便易煮為大前提：「等我靚女小惠教你哋一味『紅酒燴布冧』喇，布冧開邊，去核，落半支紅酒放平底鑊慢火煎一煎，又一道睇得又食得嘅甜品嘞！」
研究「死因」
因貪吃，兼八卦個性使然，吃飽任何美食，必每事問，問長問短問煮法，也不怕煩人：「鍾意食一樣嘢，應該了解點煮呢樣嘢，咁先謂之識食！」羊扒，她愛吃，吃飽，就研究羊的「死因」：「隻羊『釘咗』，邊部份最好味呢？羊扒好味，又點解呢？因為經過『改羊』步驟，將周圍嘅脂肪切走……唔……從解剖學角度嚟講，一塊完美嘅羊扒，就等於我呢類美女咁，安全地消脂瘦身，所以食到嘅係充滿質感、彈力嘅羊肉，唔係手臂上面嘅Bye-Bye肉。」
成功菜式一：羊餅乾（4件$98）
材料：
－免治羊肉40克
－芝士30克
－菠菜20克
－洋葱少許
－Fillo皮12塊
－牛油少許
－沙律雜菜適量
－番茄汁適量
成功菜式二：扒羊扒（3件$98）
材料：
－羊扒3件各50克
－雜菜10克
－甘笋10克
－西蘭花10克
－椰菜花10克
－蜜糖豆10克
－炸薯角10克
－三色椒10克
－黑菌汁少許
煮法
1.改羊
先「改羊」，羊架先洗淨，切去上層的肥肉與肥膏，再剔走骨與肉之間呈白色的脂肪組織。
4.淋汁
把已熟透的西蘭花、椰菜花、蜜糖豆、炸薯角、三色椒置在碟中央作伴碟，旁置3塊半生熟羊扒，預先熬好的羊汁混黑菌，在碟四邊淋汁，即成。
總廚輝少評分
MatchOne總廚輝少與小惠稔熟，不排除加友情分：「羊餅乾摺得好，隻隻三角形，直頭可以拎出嚟賣，我畀90分。扒羊扒我畀80分，因為佢揸刀有啲姐手姐腳，『改羊』嗰part唔合格呀！」
小惠評分
小惠嚙着羊扒，吃得滋味：「羊餅乾有100分，餡撈得勻旬啦、掌握焗爐時間又準啦、淋汁又淋得靚啦，總之有專業水準啦。扒羊扒我畀自己98分，因為我煎雜菜嗰陣扮型，學人玩拋鑊，拋咗兩條蜜糖豆落地，扣2分，我哀悼呢兩條蜜糖豆……」
店舖：MatchOne
地址：銅鑼灣蘭芳道3號地下
電話：34228192
營業時間：11:30am-3:00pm
6:00pm-11:30pm