睇見法政匯思嘅任建峰Kevin高高大大，一定覺得佢由細到大係大隻仔，「唔係，其實我係潺仔」。Kevin自爆細個矮、瘦、黑，望落似火柴，「阿媽都話我似嚟自埃塞俄比亞」，而且氣管好差，直至小四同家人移居澳洲後，身體先至開始強壯返……少少咁啦！

Kevin係獨生子，佢話享受自得其樂，可以單丁一個睇書聽音樂過一日。做得律師，肯定口若懸河？佢承認多嘢講，其中一次口出狂言係小學去面試期間，見到隔離同齡細路仔同佢一樣扁平足，著矯型鞋，遇故知咁同佢雞啄唔斷分享下，點知上午班校長卻叫佢收聲，「我鬧咗佢一句死八婆……」

結果上午班嘅面試失敗，峰迴路轉卻係下午班嘅校長，卻收咗佢喎。嘩，咁咪助長鬧人氣燄？又未必，「其實除非好大件事，我都會忍。」

之不過咁，小四即係約十零歲已經離港，由於Kevin身型較細粒，為免被大大嚿鬼仔同學蝦，佢喺言語上都要領下風騷，「把口唔衰啲，點生存呀？咪大家鬧惡囉!」佢同時學空手道傍身，「讀男校，冇計，係有打交文化。」佢話中五學期尾突然標高，至今都唔知道點解。

多口兼夾中學參加辯論隊，卻唔代表佢嘅志願係做律師，笑指都係咁啱得咁橋。佢話大個咗後鍾意扮鬼扮馬，「有人話我似陳振聰，早年就喺公司活動扮過」，大家覺得似唔似呢？