當年今日

窩輪搏擊:中行開車炒2466

蘋果日報 2006/10/13 08:00


美國聯儲局前主席格林斯潘認為美國樓市跌浪已完結,同現任主席伯南克所講嘅啱啱相反,邊個啱?遲吓就知,不過,照現況睇伯南克嘅贏面大啲。點解誰勝誰負好重要?因為對經濟狀況有唔同嘅意義,並會影響減息周期係咪會來臨。
港股仲係等緊機會試萬八關,成交回升咗兩日,如果真係要炒上,好友好大機會喺今日或者下個禮拜一出手,今日如果見大成交推高恒指破萬八收市,下個禮拜初可以再睇好啲。
中行C輪2466:工行招股上市,帶動國內銀行股嘅炒賣氣氛,連嗰隻習慣咗橫行懶郁嘅中行(3988)都升咗上嚟,昨日仲升破咗條50日線,成交大幅增加,睇嚟冇花冇假,炒上去應該可以試吓前高位3.675元,破咗位就睇3.80元。
隻中行C輪2466昨日報收20.7仙,成交1.21億元,屬當炒中行輪,槓桿率16.5倍(有效9.6倍),仲有140日命,溢價5.4%,對沖值0.58,引伸波幅20.7%,正股上試3.675元,2466應該會逼近38仙,正股去到3.80元,2466應該會喺46仙樓上,呢個價買,正股跌穿3.32元止蝕。
中行C輪2489:另一隻中行C輪2489都可以留意,昨日企喺26.5仙收市,槓桿率12.9倍(有效7.4倍),比2466低,但引伸波幅高啲,有25.5%,正股升上3.675元同3.80元,2489應該見43仙同埋52仙,止蝕參考同2466一樣。
俊 樺