當年今日

臨尾入波上盤悲喜易轉
球驗客手記:阿仙奴、曼聯躉變臉

蘋果日報 2003/12/28 00:00


英超「拆禮物日」可謂主場球隊惡晒,連查爾頓都「拆車」做禮物,相信亦有唔少波友同我求大俠一樣,追捧阿仙奴同曼聯,最後一分鐘結果,真係天國與地獄。

亨利「埋齋」抹一把汗
阿仙奴日前對狼隊主客和讓球同亞洲盤都要讓兩球,但睇住「兵工廠」成個下半場無心進攻,入多球都難,點知亨利完場前一分鐘省入一粒,幫我求大俠同成班追捧波友唔少。到曼聯個場,半力出擊都可以一直三比一領先,又係到完場前入波,之不過係愛華頓入波,因為曼聯讓球主客和讓一球,亞洲盤讓到球半,結果鄧肯費格遜呢個對比賽勝負無關係嘅士哥,搞到我求大俠同追捧波友谷氣到爆!

NBA頻開冷主捧馬刺贏到笑
NBA波盤喺噚日美國嘅拆禮物日狂吹冷風,十三場波竟然有十一場開咗下盤,下盤客肯定有個和味嘅BoxingDay。其中一場開上盤嘅比賽喺馬刺主場大讓魔術十二分半,結果馬刺波盤齊贏。唔單只連勝十二場,而且其中十一場重贏盤㖭,如果近排醒目捧馬刺肯定贏到笑!
泰臣撲水赴日打格鬥還債
我求大俠最近睇日本報紙,見到前世界拳王泰臣,可能喺明年初到日本,同日本嘅格鬥之王加西亞打一場比賽,而且重可能同日本相撲冠軍小曙打多場㖭!睇到呢段報道,我求大俠都有啲心翳,如果泰臣唔係唔知自愛,搞到欠債纍纍,相信都唔使為咗搵日圓而打啲咁嘅比賽。

古妮高娃搭上靚仔門神
網球「美少女」古妮高娃雖然冇打波都一段時間,但新聞就keep住見報,最近一單話佢搭上咗德甲聯球隊史特加嘅靚仔門將希迪布蘭。雖然後生仔拍吓拖都好正常,但希迪布蘭被喻為德國門神接班人,而且形象一向乖乖仔,千祈咪俾緋聞所累,喺歇冬後表現跌「watt」呀!

奧雲送鑽戒𠱁女友但唔結婚
養傷多時嘅利物浦前鋒奧雲,終於可以喺一月四日嘅足總盃復出。奧雲都幾浪漫,喺聖誕期間就花咗約十三萬港元,買咗隻鑽戒畀女友露薏絲。不過,佢就強調呢個唔係訂婚禮物。其實露薏絲幫奧雲連女都生埋,奧雲又使唔使咁強調未同佢結婚住呢?