讀者Paul問：
本人之座駕為2001年嘅本田CivicVTi，當車子嘅冷氣開放時，間歇地會吹起一股燒焦味（其間狀態：對流開關、冷氣調至攝氏20度以下，多數喺晚間由銅鑼灣經紅磡海底隧道，行駛至3號幹線公路一段路面時出現，無論畀油加速及均速行車，都曾經出現以上情況。）
本人曾經詢問過本田代理，佢哋表示可能係因為冷氣凍Coil內有小動物，又或者係地氈不潔而引起嘅，並指示一些通風、熱風透氣等方法，但可惜全無作用。故本人懷疑會否有其他原因，如對流活門不正常，或皮帶發出異味等等呢？請主持人指點一下！
Paul：
首先你一定要返回代理處堅持修理，因為出現燒焦氣味係一件嚴重嘅事情，並唔係冷氣槽出現霉味嘅小事咁簡單；根據我哋嘅經驗，呢種燒焦味可能係來自抽氣機風扇嘅電線膠。而我哋編輯部就有一部福特Ka，冷氣風口亦曾出現過一股燒焦味，不到一個星期，風扇速度掣就燒咗喇，只可調校到最大風力；而呢個速度掣更影響咗冷氣嘅恒溫功能，冷氣只可開到最大或將之關掉，如果要修理的話，更要換上數個零件，所以懷疑係電路出現毛病，必須堅持代理方面負責維修。
至於話呢種燒焦味，係因為冷氣凍Coil內有小動物或地氈不潔而引起，𠵱家所有汽車嘅抽風機入風口都有一個過濾沙塵嘅風隔，所以小動物能走進冷氣系統內可謂幾近無可能，加上你部座駕係2001年新車，應該唔會有咁樣嘅毛病。其實你都可以試一試，將吹風機調到最大風力，開啟對流活門，關掉冷氣將熱風調至最大，聞吓呢種燒焦味是否更大；如果係的話，就可能會係冷氣管道內藏有可燒焦嘅雜物等等喇。