飛哥與陳先生嘅詳細談話內容，希望佢八十歲出自傳（如鍾士元）時，詳細紀錄之。佢喺立法會話：「我李鵬飛最大弱點就係我太太。」天下老婆，聽見老公咁樣公開講，一定心都軟晒，眼淚奪眶而出。
每個人都有弱點。記得睇過FrederickForsyth一本間諜小說，講第一次波斯灣戰爭，美國CIA喺侯賽因身邊，有一個線人，線人經常提供可靠資料，其中有關以色列嘅部份，CIA就間中通知以色列情報組織Mossad，M組織最唔鍾意知啲唔知啲，想話找出誰是線人。根據若干情報，CIA喺維也納過水，但所有銀行紀錄（電腦上紀錄）都查唔到過水詳情。以色列派人到維也納追蹤，卒之搵到一間歷史悠久嘅小型銀行，負責入帳嘅經理係第一悶蛋，生活刻板，返工放工返屋企食飯上床，日日如是。情報人員向上頭報告，上頭大罵：「人人都有弱點，不出男人、女人、及錢、嗜好四大類，你哋一定要搵出嚟，要脅佢！」後來以色列間諜卒之搵到弱點，偵破伊拉克線人是誰。飛哥嘅弱點咁易搵，有心人一擊即中。睇間諜小說，唔止係去沙灘過日辰，有陣時頗具現實意義。