當年今日

掃平貨:
唔使一千元買名牌靚表

蘋果日報 2002/05/30 00:00


𠵱家經濟唔好,樣樣都要慳,但手表呢類必需品又唔可以缺少,幾百蚊買隻電子表,行街睇戲就冇問題,要襯斯文上班服就始終唔夠睇頭。今次呢個手表開倉,以斯文款式為主打,法國品牌MONTANA、瑞士GREENWICHLONDON、日本YuppiesTOKYO等名牌均有,唔單止採用水晶表面甚至鑲上晶石,部份更係Mango、張美妮等藝人擁有嘅靚表,𠵱家全部唔使一千蚊,的確抵買。

記者:張穎倫 攝影:林栢鈞、陳偉強
女裝G.M.T.鑲滿晶石
想買限量生產手表嘅朋友,一定對瑞士嘅G.M.T.手表有興趣,事關佢每款手表,全球都只會限量生產199隻,更喺表底刻上生產編號,並有出世紙證明,相當嚴謹。呢款鑲滿晶石嘅女裝表款,真皮表帶配襯水晶表面,更採用鋁質表身,極之輕巧。另一方面,羅馬字樣同夜光時針,令用家能清楚睇到時間,方形表面更係今年流行款式,女孩子點都要有隻傍身。
YuppiesTOKYO潮流貴氣
有睇開日本雜誌嘅朋友都可能會見過YuppiesTOKYO嘅手表,賣點係表款富潮流氣息,再配襯閃閃晶石,睇落好有貴氣。好似呢款女裝晶石手表,兩邊鑲上共16粒晶石,閃得嚟又唔算誇張,再襯埋粉藍色表帶,配搭青春自然。𠵱家購買更送多一條黑白表帶,隨你替換。
迷彩Look夠長青
雖然今年冇話特別興迷彩Look,但每年夏天總會有迷彩Look嘅產品出現,絕對長青。所以呢款YuppiesTOKYO採用迷彩綠表帶,啱晒鍾意實際嘅朋友。而且呢款表亦採用晶石鑲嵌外框,外圈所用嘅晶石,更比表冠上嘅大粒,層次分明。
GREENWICHLONDON有品味
鍾意格仔表帶嘅朋友,呢款GREENWICHLONDON嘅女裝表就一定啱心水。事關佢嘅卡其色黑白格仔表帶,Fashion味極之濃厚,襯衫容易,感覺又有品味。再加上佢除咗外框鑲有大量晶石外,表面則只有4粒晶石,Cut晒所有數字,非常簡潔。
新款MONTANA首次咁平
MONTANA呢個法國品牌,出開嘅表都有唔少人捧場,喺市場中都有一定地位,所以今次由$3,200減到$980絕對係史無前例。好似呢款女裝OL表,採用水晶表面,由表帶以至表盒都以真皮製造,絕對高貴。表面雖然只得24mm,但一樣有日曆顯示,表殼更採用不規則凹凸線條設計,表款獨特精巧。
LAVIAN青春粉色膠帶
天氣炎熱,唔少女孩子都會覺得粉色嘅表帶,睇落比較清爽。所以呢款法國LAVIAN除咗有一條粉藍色表帶外,更會送多一條粉紅色表帶,可以任你替換。呢款表鑲上大量晶石,效果閃閃生輝,配上白表面和羅馬數字,啱晒年輕少女。
男裝推介
水晶表面超薄外殼
嚟自瑞士嘅GREENWICHLONDON,主打超薄外殼最出名。好似呢款男裝鋼表,雖然表面都有32mm直徑,但外殼卻只厚5mm,絕對夠薄。表帶選用11珠帶,表面放棄用數字或羅馬字,而改用12粒晶石,再配埋水晶表面,一貫瑞士表的風格。
抵買CHRONOGRAPH
喺芸芸表款之中,擁有三圈計時嘅CHRONOGRAPH永遠都係表迷嘅摯愛。之不過一般CHRONOGRAPH最平都要過千蚊一隻,如果有牌子的話,閒閒哋幾千蚊都實不為過。所以呢款法國設計嘅MONTANA就絕對抵買。擁有40mm特大表面,超級型仔,而且更有埋日曆顯示,CHRONOGRAPH之中唔係隻隻有。此表乃瑞士製造,以及有200米防水功能,絕對係男士們的首選!
多功能表款靚
呢隻同樣都係全球限量199隻嘅G.M.T.男裝表款,除咗表款得體,功能亦絕不失禮,佢有齊表面三圈計時功能,又有日曆提示,更厲害連星期顯示都有埋,絕對係有姿勢有實際之作。
開倉資料:
永昇名錶行
電話:25777197
地址:北角屈臣道2-8號
海景大廈A座1101室
開倉日期:即日起至6月30日
營業時間:10:00am-7:00pm