疫情下嘅四大聯賽，「大細」都有新趨勢，之前講過意甲、德甲旺「大」，西甲就旺「細」；不過情況開始改變，特別係西甲，近期轉吹「大」風，上星期9場波有6場開「大」，周中6場波更加有5場「大」，食住個勢，呢個周末繼續追西甲「大」波。

重心係周六皇家蘇斯達（圖）主場對貝迪斯呢場，皇蘇踢法一向進取，今季仲有大衛施華加盟，火力有增無減，一度升到西甲第二位，衰在12月因為傷兵潮，大衛施華、贊奴沙、伊拿拉文迪等主力輪住受傷，差唔多成個月冇贏過波，好彩一眾傷兵已經陸續復出，西超盃對巴塞法定時間都唔使輸，上仗西盃半力都數對手兩蛋，主力養精蓄銳，更重要係施華仔有望今仗復出，入波一定唔少。

貝迪斯由前曼城領隊比歷連尼領軍，風格都幾主攻，連同盃賽已經四連勝，難得呢4場波都至少攻入2球，首循環主場大敗畀皇蘇0:3，今場睇個勢唔會吞蛋，兩隊鬥攻之下，入球「大」穩陣。

阿特蘭大曾經係唔少人捧「大」至愛，不過呢期變成「阿特難大」，周六阿特蘭大作客AC米蘭，米蘭爭標當前，呢期都穩陣咗好多，連續三場冇失波，一於捧番個「細」。

文：Goal進

截稿前馬會尚未開盤，盤口僅供參考，讀者記得留意足智彩網頁。