中石油（857）批股抽水211億元，股價不跌反升，顯然係對沖基金一早收到風預先拋空，然後認講新股補倉所致。呢啲錢肯定唔係一般散戶可以賺得到，諗落都覺得唔公平。
噚日大市勁升二百幾點，除咗大型重磅股股價上揚之外，唔少細價股亦出嚟搵食。先一排經紀陳提過股價升極都唔肯停嘅東方工業（353），繼續唔聲唔聲咁炒上，噚日又創新高。
東方工業昨日升6.7％，收1.59元，相比52周最低位0.156元，同埋近1個月低位0.58元，就知隻股升得幾誇張，但偏偏隻股成交唔係細，日日金額都有成過千萬銀，例如昨日成交就有2638萬元。
經紀陳今次又有新補充，佢話自從新老闆正式入主，以及委任新董事後，傳聞隻股即將在大陸收購倉儲物流之類嘅生意。
小初真係諗極都唔明，除咗隻股係私人派對外，實在諗唔通有乜理由可以咁樣升法。
慕容小初