父母與子女嘅關係可以好親密，亦可以好疏離，啲專家話，其實只要父母多啲同仔女溝通、悉心照顧佢哋，就可以加深彼此嘅感情嘞；不過喺現實世界，唔少家長要為口奔馳，根本就冇乜時間陪仔女，咁又點可以加強親子關係呢？
bunchargum喺《MSN》討論區留言話：「唔少有工作狂嘅父母，為咗賺多啲錢提供下一代更優質嘅生活環境，好似安排佢哋入讀私立名校、請補習導師、住大屋、着靚衫……不惜犧牲同子女相處嘅時間。但亦有父母寧願搵少啲錢，都盡量騰出多啲時間陪伴年幼嘅仔女，咁佢哋嘅物質生活自然會差啲。如果有得揀，究竟邊類型父母對子女成長比較好呢？」
網友JW直截了當回應話：「毫無疑問，仔女梗係希望父母有多啲時間留喺身邊，好過淨係識畀錢佢使啦！」

不過，laterbloomer就唔多同意，「仔女嘅起居飲食可以交畀保母照顧，咁父母出外搵多啲錢，先至有能力提供最好嘅生活環境畀佢哋。」
sartreman就認為，父母要識得喺事業同家庭生活之間取得平衡，「如果畀啲小朋友揀，佢可能希望父母好有錢，等佢哋可以得到各種物質享受；但長遠嚟講，童年時經常有父母陪伴在側嘅細路，應該會開心啲。」
gregintenn好同意咁話：「成人喺工作同家庭之間要取得平衡，對我嚟講，凡事都會以家庭為重。」咁又係，家務可以搵人代勞，但親子活動又點可以假手於人呢！積穀防饑，提升生活水平固然係好事，但對仔女嚟講，同父母一齊走過嘅珍貴歲月、幸福快樂嘅童年回憶，可能先係佢哋人生中，家長送畀佢哋嘅最佳禮物。