小初噚日撞見經紀黃，佢話想趁長城數碼（689）今日除權，博大霧炒一轉。小初真係服佢藝高人膽大。
長城數碼今次1供4，每股1仙，集資淨額6460萬元。橫睇掂睇，都似係唔想人供股，想乘機收貨嘅格局。
長城數碼公布供股後，股價一度勁跌至3仙，但收尾又抽番上嚟，上周五收5.6仙，或者係有人睇穿炒家個局都唔定。
以上周五收市價5.6仙計，今次理論除權價係1.92仙。經紀黃話，以往長城數碼低價供股或者配售新股後，例必有一番炒作。
經紀黃又話今日除權，由於新股尚未收到，假如炒家又想托住個價，方便稍後出貨，所以股價或者有得炒。
另外，掛牌兩日嘅天鷹電腦（1129），第一日勁升，第二日回軟，跌16%，收62仙，仍較招股價50仙高24%。靚女經紀話跌得差唔多，將會再升。小初心諗，係真唔係呀？