禽流感呢味嘢，原來若然有某啲親中老人揩正，症狀就係頭腦發瘟，開始語無倫次。
所謂人大常委曾憲梓，接受某報訪問，竟然兇神惡煞，口出狂言，大罵香港人「身在福中不知福」，重公然代表中央人民政府，聲稱「中央」絕不容二○○七年普選！（胡紅玉老公秦家聰就搵到證據話當年中國外交部講過呢個係特區嘅事。）
○七普選，曾蔭權先至做咗個諮詢小組組長，點知尚未諮詢，就俾曾憲梓私自以「國家領導人」身份，一手撕開假諮詢嘅畫皮，踢爆話中央人民政府絕不准○七普選。

破口大罵　毒性太猛
既然係咁，曾蔭權𢭃幾十萬一個月人工，做一場偽諮詢嘅假騷，原來係裝假狗，咁咪直頭浪費納稅人公帑？曾憲梓唔理咁多，繼續破口大罵，○七直選，即係要特區政府癱瘓，搞亂香港。跟住，唔知係咪人老咗，有少少癡呆，佢竟然敵我不分，大罵民建聯，俾人話一句「保皇」，就任由強姦，屈服轉軚！
呢隻政治禽流感，毒性太猛，可能引起咗中方高層極度關注，或者有人同佢打咗支針，昨日曾憲梓就口氣突然轉軚，喺一個酒會，話佢冇講過中央人民政府不准○七普選。
諗諗吓，又冇錯。何為曾憲梓，佢只不過係做價格廉宜嘅領呔生意出身，二十年來，佢對祖國最大嘅貢獻，就係令到全國成千上萬收入低微嘅農村耕田界人民，可以一路打住條呔，一路趕住隻水牛嚟耕田。於是國家論功行賞，賞賜咗個人大常委畀佢做。佢咁就以為自己真係做咗中央領導人？
中央領導人，冇錯係姓曾，不過就叫曾慶紅。香港嘅政制諮詢領導人，又係姓曾，不過就叫曾蔭權，而且曾蔭權係哈佛高材生，有番咁上下品味，佢唔會打平價呔，而係專打煲呔。趁住廢董龜縮，曾憲梓篡黨奪權，佢一出聲，連累何鴻燊都揩埋一份，話○七直選？「發夢都冇咁早」！