中大校長沈祖堯第日可能變埋生仔神醫，佢噚日出席學生活動時，喺台上爆生男Ｂ秘方，就係狂食橙。祖堯BB話有位生咗4個女嘅同事，好想追個仔，佢唔知邊度聽番嚟要食橙，果然得咗，原來食咗4箱橙，引嚟全場爆笑。佢冇講明同事點狂吞咁多橙，但講到似層層，睇怕好快呢個秘方傳開，啲橙又會被搶貴。有接近祖堯BB嘅人話佢成日吹水唔抹嘴，信不信由你。
噚日同台嘅港大微生物學系講座教授袁國勇同沈校長都係沙士英雄，袁教授話佢基本上唔食生嘢，因為𠵱家啲菌越嚟越惡，抗生素就嚟對付唔到，農夫又濫用抗生素，佢連食生果都要用生果清潔劑洗或熱水淥一淥，先至剝皮食。兩人又講到人生的浪漫，祖堯BB重申是指年輕人應該有理想，「如果年輕人目標係買樓上車，三五七年買咗樓，之後等死？」袁坦白話：「I am a boring person，我唔浪漫。」