即使回復「平民」身份，葉劉淑儀的「功過」仍是不少市民爭論的話題。讚揚她的市民認為，葉太由普通政務官，晉升至問責局長，必定有其才幹；貶斥葉太的市民批評她故意扭曲市民對《基本法》23條的意見，是無誠信的表現，也有市民直言，葉劉淑儀只是受庸碌的「老闆」董建華所累。

「風雨飄搖夠硬淨」
昨日的香港電台《千禧年代》節目中，十多名市民致電評論葉劉淑儀的政績，有支持葉太的聽眾形容她「風雨飄搖夠硬淨」、「佢做得好好，盡咗僱員職責」，其中一位市民區先生說：「葉太推介23條非常之盡忠，為國家好，嗰啲為反對而反對嘅人，盡力挖苦佢，特登撩起佢把火。」

一次打沉以往功績
但貶斥葉太的也有不少，市民劉先生認為，從23條《意見匯編》中可見，她故意扭曲市民的意見，是沒有誠信的表現；有人則翻舊帳，指爭居權人士圍堵葉太座駕事件是她故意製造出來，以打壓該批人士，「佢做幾件事都係咁，挑起你嘅情緒，之後用呢啲原因嚟打你！」
市民容先生認為，7.1有五十萬市民上街遊行，葉太的「功勞」不少，「五十萬人之中有一半係俾佢『趕』出嚟……葉劉淑儀以前冇咁乞人憎，點解𠵱家咁樣，係佢傲慢、潑辣，講嘅嘢唔係市民心聲，以前嘅功績一次打沉晒。」
有市民更認為，葉太本身很有才幹，但卻被特首董建華所累，市民張先生形容她是「一個好有才幹嘅僱員，如果佢嘅老細係好庸碌、唔決斷英明，係唔可以發揮才能！」市民區先生也說：「傳媒、公眾叫葉太做掃把頭，我覺得係好可悲。我認為董生唔係能幹嘅人，有少少感覺，任何Fit馬畀阿董生，都可能俾佢玩死！」
本報記者