河國榮內地節目堅持唱廣東歌
自嘲最強大老外龍套

蘋果日報 2017/10/14 05:20

鄭少秋河國榮笑看風雲廣東歌

一般人追求夢想可以追到幾多歲?呢個世界講追求夢想,真係唔多實際,但係唔追就係鹹魚,咁追唔追先?
現年52歲嘅河國榮一直冇放棄過唱歌呢個夢想,最近佢又上台唱歌喇。今次好特別,就係以外國人身份上內地電視節目唱廣東歌,仲要唱電視劇《笑看風雲》主題曲添。
邀請河國榮唱歌嘅綜藝節目《唱響中華》每集都會請外籍人士上台唱中文歌,剛剛播映嘅第3集就請咗我哋熟悉嘅河國榮。香港人梗係知道河國榮識講廣東話同普通話,但係3個主持一聽到佢講普通話,就顯得好驚訝。
河國榮介紹自己曾經係香港電視台演員,女主持認得佢:「是不是專門演警察的那個?」河國榮就話「我想我拍過兩百多部電視劇,拍了那麼多都是龍套,可是我現在變成是最強大的老外龍套。」
之後河國榮表示要唱歌:「今天唱歌,就是《笑看風雲》,廣東話。」強調唱嘅係廣東歌,河國榮果然對廣東歌有堅持,冇為咗討好內地觀眾而唱普通話歌。而佢唱歌時亦保持一貫水準,觀眾都拍晒手,唱完之後女主持仲講廣東話大讚:「好犀利呀!」
河國榮喺澳洲出世,讀大學嗰陣已經開始聽廣東流行曲,22歲嚟香港定居至正式學講廣東話。佢9月喺facebook都出過po,話呢次係到上海錄呢個節目:「可以認識到另外40位來自全世界、國語很棒、歌唱非常好聽的老外就特別開心。」