曾經同張栢芝合作拍電影《楊門女將之軍令如山》嘅鄭佩佩，日前喺內地接受訪問，講起佢喺娛樂圈合作過嘅藝人啲相處點滴，講講吓忍唔住炮轟栢芝，佢話：「工作態度很不好，其實她戲演得很不錯的，但是在那個戲裏，給我們香港演員丟臉，可能那時她有一點家庭問題吧，但也不能把家庭帶到工作中，她應該學會體諒工作人員。」
查實嗰陣已經有唔少傳言，話高調復出拍戲賺奶粉錢嘅栢芝，因為片約太多搞到佢個期爆晒，最後因為佢趕拍王晶嘅《無價之寶》，搞到《楊門》遲遲都未殺青，隔咗咁多年先講，睇嚟佩佩姐都忍咗好耐！主持又問周星馳、成龍、黃曉明、古天樂同郭富城邊個最風流，佩佩姐老實唔客氣話：「最差梗係成龍。」

開工受傷相反擊

栢芝粉絲知道呢件事，梗係為偶像抱不平，喺微博貼咗好多栢芝拍戲受傷嘅相，仲留言話：「這些除了你的粉絲之外，沒人看得到，更沒人在意。我的愛人，願這個世界待你溫柔再溫柔，善意再善意點！」佩佩姐可能見到栢芝粉絲嘅回應，噚日若有所指咁喺微博留言：「至於我說錯話，那是我活該，誰讓我不聽小鬼的話，『三思而後行』」。另外，狄波拉噚晚出席喺太古城嘅開幕活動，問到栢芝俾人數臭，佢話：「你哋放過我喇，我俾人撥咗做奸角幾十年，畀我做番一次好人，唔好逼我埋去死角！」
撰文：馮仁昭

【我撐公投】毅行直播
網頁: http://622popvote.appledaily.com