歐錦棠同太太萬斯敏嘅劇道場將會喺呢個月19日喺上環文娛中心演出《春雨歸來》，日前佢哋喺九龍灣綵排，阿棠同萬斯敏之間默契十足，仲學韓星晒心形手勢，認真鬼馬又恩愛。

佢哋兩公婆曾經喺婚姻上經過離離合合，但係最後都捱過難關，再走埋一齊生活，講到目前嘅相處情況，阿棠話：「之前同太太分開咗，嗰陣啲關係又唔係咁好，加上我又有抑鬱症，不過有咗宗教信仰後，自己會慢慢學習去改變，處事同對人都同以前唔同，內外會自我更新，睇嘢嘅角度同人生嘅意義都唔同咗。」佢仲話：「O依家太太負責做把關提點我，如果佢見到我架火車有啲出軌，一定有辦法扭轉我盤軚，當然，我哋都有爭拗嘅時候，但係總有一方會妥協，磨到掂為止！」

至於生B方面，阿棠話：「吓？咁貴，讀埋呢啲咁嘅書，唔好喇！」萬斯敏亦都話：「結婚嗰陣有共識唔生b，加上社會咁樣，如果要生成個計劃都唔一樣，我哋0依家當咗劇團係小朋友。」

講到呢齣舞台劇，阿棠話：「今次係講30年師生情誼，講人生競賽嗰啲嘢，我嘅母校知道話會拉大隊支持，教育局都話大力支持，我覺得好感動。」之不過向來不平則鳴嘅阿棠，今次竟然冇刻意加入啲爭議性嘅聲音，佢話：「O依家唔合理又荒唐怪誕嘅事，其實幾百年前都有，歷史係不斷重覆，啲人睇落都好似講緊我哋O依家嘅情況，所以唔會太著跡去講，反而今次有好多諗頭，有啲係比較商業化，加上我又好百厭想加入自己原素。」