日前有報道指許志安乘鄭秀文到廣州公幹期間，與一貌似前緋聞女友胡敏珊的女子蒲吧，並親熱錫面。安仔昨日召開記者會否認「偷食」事件，但承認當晚曾送一女性朋友返家。自言一向檢點的安仔，又直指偷食字眼核突。

許志安與鄭秀文（Sammi）這一對銀色戀人分分合合的消息，一直傳個沒完沒了，最新一期《壹週刊》有報道指安仔趁Sammi於上周四（七日）到廣州為新戲宣傳時，與吳國敬等友人到跑馬地消遣兼偷食。報道又指安仔與兩名圈外友人於半夜離去時，跟一名貌似胡敏珊的女子有親暱舉動，安仔除輕吻對方外，他駕車接載該女子離去後，更整夜都沒有回家。

稱有返家過夜
安仔昨日罕有地在尖沙嘴金牌經理人公司，召開記者會回應緋聞，他甫出現即笑容滿面地向在場二十多名記者，連聲說恭喜發財，態度從容。
安仔說：「我不嬲都唔回應呢啲嘢，但今次幾過分，完全係作得好緊要，真實版本係我當晚同朋友去玩，走時同個男性朋友一齊諗住去另一個朋友度，傾組團去睇世界盃啲嘢，我做搞手嘛。後來遇到個女性朋友，半夜三更，我盡男士風度送佢返去，當時係兩架車走㗎。講到我啲朋友做把風，影條柱又話我喺條柱後面，嗰晚我有返屋企㗎，佢哋作嘢就叻。」

「俾人影到會認」
安仔續說：「究竟我送個女仔返屋企有冇錯呢？本來係好正常嘅事，我明白做藝人係要失去好多嘢，但如果連車個朋友返屋企都唔得，就好過分。我都知食得鹹魚抵得渴，我平時都好小心，俾人影到會認。我份人自問好檢點，但唔係話我做嗰樣嘢唔夠interesting，就作多啲等佢賣多啲，車朋友返屋企唔算唔檢點。」
談到前緋聞女友胡敏珊時，安仔說：「胡敏珊係我最好嘅圈外朋友嘅女友，佢哋拍咗拖六、七年，我嘅圈外朋友唔應該承受啲不實報道。」