向太繼續鬧東東轟無綫
柏芝臥床弟送跳跳虎陪睡覺
張柏芝為仁濟飛車受傷後，上半身已打石膏，其弟張柏文前晚則帶着巨型跳跳虎公仔往探病。而向太陳嵐往探柏芝時，提到陳曉東她再度發火。
張柏芝為仁濟飛車受傷後繼續留院，其弟張柏文前晚帶着一隻四呎高的卡通公仔跳跳虎往探病，逗胞姊開心，而前晚向太陳嵐則帶燕窩及魚翅給柏芝吃。
「安全措施不足」
向太離開時談及柏芝病況，她說：「有兩個骨科醫生睇佢，佢上半身打石膏，個身固定咗郁唔到就唔會痛，個石膏可以開合，隨時可以檢查。佢條頸嘅肌肉拉傷咗，有少少痛。」
向太續說：「所有人都認為安全措施做得唔夠先會出事，張櫈冇包住個人，點解唔用嗰隻『筒sit』（賽車專用櫈）？」向太又表示她聽了吳君如的商台節目，君如大爆以往羅莽打爛枱的表演，枱是假的，向太說：「𠵱家根本就冇需要做危險節目，會癱㗎嘛。」
東東曾致電柏芝
提到陳曉東（東東）有否再致電柏芝，向太一聽東東名字再度變臉，她說：「佢係唯一令我喺傳媒面前冇風度嘅人，我最嬲佢話柏芝打麻雀，佢可能講笑，但觀眾睇到會覺得我哋講大話。」東東曾否直接致電柏芝？向太說：「有，多謝佢關心。」
柏芝為仁濟亡命飛車項目籌款一百三十萬元，比林憶蓮高歌一曲籌一百一十萬，只差二十萬，向太說：「金額係內定嘅，呢啲係遊戲規則，有總理俾人屈多三十萬啫（起初柏芝的項目善款只有一百萬）。」
對於前日向太表示柏芝後悔為慈善做危險飛車，柏芝父親鬍鬚勇昨日往醫院探柏芝後，表示要澄清，他說：「柏芝特登叫我解釋番，可能係向太誤會咗佢意思，佢唔係後悔，只係發生件事搞到屋企人咁頻撲，唔係咁好啫。」而周星馳昨日亦找人送花籃到醫院，慰問柏芝。
採訪：汪正文、彭琮然、胡比、王崇穎
攝影：陳偉權、黃文成、羅德光
跳跳虎小熊維尼老友鬼鬼
跳跳虎（Tigger）是迪士尼動畫小熊維尼（WinniethePooh）系列中的卡通人物之一，牠是小熊維尼的好朋友。跳跳虎性格極之好動，經常跳跳紮紮，喜愛在森林中蹦蹦跳，亦不時闖禍，並喜歡與其他朋友，包括小熊維尼、小豬（Piglet）及兔子瑞比（Rabbit）等，在森林裏一同唱遊及玩耍。