復活節冇乜新聞，搞到我阿利周身唔自在。慣咗平時晨早攞幾份報紙去茶樓歎茶，點知呢幾日三扒兩撥就成份睇鬼晒，不知幾冇癮。
冇新聞，記者識自己摷。其中一單，就係各大黨如何喺年底選委會霸位。一時又話當直選做，一時又話要特首企出嚟站台。睇嚟特首畀得太多甜頭，初時餵乾糧，之後餵牛排，愈食愈豐富。下次睇怕連主人隻右手都要𡁻埋先開心。
會計界都有二十個位，都應該係各黨派爭逐之地。橫掂我阿利睇完報紙冇嘢做，又未食完碗粥，一於估計吓各黨派響會計界有幾多斤両。
民建聯咁把炮，先講佢哋。照我阿利打滾幾十年，再加上睇睇現任選委我啲老友嘅名單，民建聯響會計界可謂一啲實力都冇。就算你話謙虛啲，係咁意攞番一兩個位，以今時今日嘅競爭情況，都非常艱難。除非你話響二萬幾個會員入面，有好多隱形黨員養兵千日，用在年底。否則，會計界民建聯一定包尾。
自由黨應該會有啲票，上次補選都好似有個黨員排第四。商家佬喺會計界點都有啲影響力，要攞三兩個位，有機。

公民黨民主黨呢兩個民主派，喺會計界應該係政黨之中最有票。唔係因為有個肥女神，佢響會計界查實冇乜影響力，反而大部份會計佬都幾buy民主呢個concept，只要睇上次補選，民主候選人有五百幾票搞掂就知。呢五百幾票，直情係民主鐵票。如果每個民主候選人都有呢五百票打底，易選好多。計我話，民主派擸五六個位閒閒哋。
計來計去，都未湊夠二十個位，唔通我阿利計錯數？梗係唔係，淨番嗰十零個位，都應該係冇黨冇派。話晒啲出名兼有「Fan屎」嘅會計佬，唔鍾意入黨，又點會容易埋人哋堆。之不過，佢哋都應該同政府好friendly，嚴格嚟講，叫政府黨都得。
數係咁計，但會計佬冇政黨咁識選舉，五年前阿胡定旭選都輸，就證明呢味嘢唔係識得人多就大晒。所以話，到時實有龍爭虎鬥。
密搵利

傳真︰2623-9278
電郵︰[email protected]