上周賣地成績理想，地產股受刺激急升，唔少地產股已由低位回升頗多，家陣先至推介地產股，似乎慢三拍。但經紀陳對老虎仔信心十足，所以仍然推薦遠東發展（035）。
遠展上周五先升後回，跌2.3%，收1.29元，成交股數1030萬股，金額1359萬元。經紀陳話，雖然遠展由近期谷底的0.89元升番唔少，但中長線仍然可以睇好，皆因公司大計多多。據講全年業績會好好，股價較資產值折讓又大，只要留得住班芬佬，應該唔使擔心股價表現。
經紀陳話，比較其他二三線地產股，遠展表現算係咁，隻股深受炒家歡迎，一旦股價跌得過殘，則會見到炒家出嚟接貨，所以炒得比較安心，唔似得有個別同類股，一跌就直插到底，直至大家死心沽貨，大戶在低位收齊貨時，才會失驚無神炒番上去。
遠展將在7月份公布全年業績，單睇中期業績賺4256萬元，較去年同期上升463%，如無意外，全年業績應該唔會差。
慕容小初