當年今日

馮仁昭四圍超:張如城隨身帶吹氣公仔

蘋果日報 2002/01/14 00:00


自封為「亞洲神童」、十四歲嘅樂壇新人張如城,上星期五去咗新城電台幫陳小芝主持嘅節目《我芝訂》做嘉賓主持,張如城重特別幫節目作咗首主題曲《呼應》,喺嗰日足本首播。

廁所邂逅
張如城同小芝之前未見過面,所以嗰日佢兩個都準備咗份見面禮畀對方,點知張如城當日去到新城電台,突然人有三急,咁啱喺廁所門口撞見小芝,兩個人喺廁所初次邂逅,搞到交換禮物時冇晒驚喜。
不過張如城收到小芝份禮物都好開心,小芝送咗一個自己樣貌嘅吹氣公仔畀張如城,張如城見到覺得好得意重即刻掛喺自己頂帽上面,真係好鬼cutie㗎。而張如城就寫咗張好正氣嘅卡畀小芝。
王菲累EMI收警告信
王菲喺上海拍緊《天下無雙》返唔到嚟出席頒獎禮,雖然EMI同王菲都好想返嚟,但𠵱家《天》片喺上海每日拆兩組拍,早班由劉鎮偉拍,夜班就由王家衞拍,鬼死咁趕,澤東電影公司點會肯放人,而且澤東費事俾唱片公司煩住,索性畀封信EMI,提醒佢哋王菲同澤東要履行電影合約。

鄧小艾拍拖最緊要開心
鄧小艾與張文聰拍咗年幾拖,𠵱家感情重好好,噚日馮仁昭收到佢電話,小艾話搬離咗永祥大廈之後,佢依然有返楚留香做嘢,至於同哥哥鄧兆尊嘅關係,佢話兩人都曾經坐低過詳談,兩兄妹感情仍然係好好。小艾重話個對象係自己揀嘅,所以佢唔會理人點睇佢哋,最緊要係自己開心就得。

張承勷加盟英皇搞電影
英皇娛樂近排搵咗幾位資深幕後人做班底,繼吳雨入主唱片部之後,新城電台前行政總裁張承勷,喺兩個禮拜前亦都正式加盟英皇電影部,擔任顧問一職,同電影部嘅揸fit人陳嘉上拍住上,張承勷喺呢行打滾多年,經驗老到,相信佢入咗英皇,都會對公司有唔少幫助。