作為星二代，加上阿媽係王菲，所以竇靖童(童童)一出世就已經備受關注，依家佢出唱片做歌手，連帶佢嘅感情生活大家都好有興趣。

竇靖童雖然只有19歲，但都有唔少緋聞，2013年16歲嘅童童仍然留住長髮，當年有報道指，佢同北京嘅一位男同學撻著，仲一齊夜蒲，畀媽咪「棒打鴛鴦」。另外，當時又有一張童童同外籍男生嘅合照流出，二人齊食薄餅，感情非常要好，外間仲猜測佢哋拍拖，但童童否認，話係「哥兒們」。

另外，媽咪王菲同上山詩鈉係老友，童童同上山詩鈉囡囡Hilary自然係青梅竹馬由細玩到大，佢哋成日都上載好close嘅合照，仲曾經轉出緋聞o添！而日籍女星水原希子近年同竇靖童真係friend過打band，童童去日本開show，水原希子仲親自接待佢，之後童童喺香港開騷，水原希子又親自嚟香港睇佢表演，兩人又會喺內地食買玩蒲，真係去邊都一齊。

去年，又傳出童童同混血女友人嘅親密合照，仲有指佢哋係非一般關係！直至去年尾，童童喺北京機場被影到同設計師RebeccaTsang同行，之後再不時被影到兩人結伴同行，有影皆雙，童童真係好有「同性緣」!