本來同成班妹妹仔一齊唱歌嘅「豆泥沙」，最近出碟突然間好似紅咗好多，仲成日着到好似小公主咁，好多人都同關仁講話覺得佢靚咗好多，唔知係人紅咗，行起運嚟特別順眼，定係佢靜雞雞整咗容，但又講唔出整咗邊度，淨係覺得佢對本來黐得好埋嘅眼唔同咗，變咗又大又有神。不過豆泥沙本來就係雙眼皮㗎啦，應該唔係割雙眼皮，又有人話佢呢排化嘅妝好濃，可能係化妝令到佢靚咗。

最新割眼法

不過有二五八畀關仁聽，話𠵱家有個新嘅整容割眼方法，唔係成隻眼割晒，淨係喺雙眼近鼻樑嘅位置割深啲，如果唔化妝，會睇到同普通人嘅眼形有少少唔同，所以豆泥沙呢排成日化到對眼烏卒卒，等人睇唔清楚佢啲眼皮做過手腳，又可以話畀人聽係化妝效果，所以對眼咁醒神，真係一舉兩得。