當年今日

海外車訊:
新版積架XJ變得豪

蘋果日報 2002/09/19 00:00


嚟緊9月下旬嘅法國巴黎展上,英國積架車廠將會推出全新XJ系列高級轎車;除造型變得流暢趨時外,全新鋁合金車體匹配4台新引擎組合,加上擴闊嘅車廂空間,可予人有倍覺自在舒適嘅乘坐感受㗎!再者,全新懸掛設計加有氣墊式吸震筒,還帶出順滑嘅操控感受呢!
記者:陳偉林
車廂變得寬闊設備講究
在一眾設計師嘅努力下,新車車廂空間要較前擴闊得多,給乘客有更充裕闊落嘅體驗。其次,車門壁加厚既富保護力又見有出眾隔音功效,而全新剪裁嘅高級皮椅組合,予人舒適妥貼外,一雙前排座椅嘅全方位電控,重好適合長途旅客使用㗎!再者,XJ車系頂級版更備有高級影視裝置,加埋傳神嘅音響組合,置身其中會有猶如置身家中嘅愜意感呢!
新偈新波箱帶出好體驗
快將於明年登場嘅XJ新車系,共備有四台引擎選擇,除頂級4.2公升V8Supercharged偈(馬力400匹)及4.2公升V8自然吸氣偈(馬力300匹)外,新加入嘅3.5公升V8(馬力262匹)同3.0公升V6偈(馬力240匹),同樣給人有一新耳目嘅體驗。另外,新車更會改配ZF嘅6前速自動波箱,令引擎發揮得更流暢順滑外,前後雙搖臂懸掛設計,重加有Self-level嘅氣壓式吸震筒,除能給予乘客有感軟硬適中之餘,重有承托力足嘅循迹表現。再者,電子循迹系統匹配牽引防滑(DSC)裝置、電子泊車制動等先進組合,相信新款XJ車系定必會帶來有更可靠之感㗎!
新構思帶出新造型
與時並進還得要保留造車傳統,會係英國積架車廠研製全新XJ車系嘅理念;改用上鋁合金車體結構,要比鋼鑄來得輕巧之餘,亦見堅厚富保護性;全新鬼面罩匹配新款頭燈組合,重予人有趨時富活力嘅感覺㖭。再者,新構思嘅頭尾冚造型及線條,還帶出新款XJ車系有另一番豪邁過人嘅魅力,得以跟一眾歐洲高級轎車媲美。