當年今日

食物安全 - 左丁山

蘋果日報 2006/10/13 08:00


廸士尼樂園幾唔夠運,負面新聞不時出現,最新一單竟然係四名遊客聲稱在探險世界嘅河景餐廳食過小籠包、炒飯之後,肚瀉嘔吐,送院治理。不久之前,美麗華酒店自助餐發生相同事件,跟住就有港麗酒店自助餐懷疑中毒。喂,高級酒店餐廳接連出事,究竟係個別偶然性,還是系統性呀?食環署對此有無了解?
上星期日本欄講安全意識,講到日本極度注重安全,成本在所不惜,而日本人亦樂於畀更高價錢,因為佢哋買入嘅,唔剩只係食物或貨品,而且包括咗食物/貨品嘅包裝、服務及安全。問題係,廸士尼、美麗華、港麗三間,已經係「高價貨」,點解仍然發生懷疑中毒事件?係供應商唔掂吖,還是酒店入貨時冇做好品質監察、抑或供應商與業者嘅品檢態度唔夠嚴謹?
胡適嗰篇「差不多先生」,係中國人最佳寫照。搞品質管制,抱「差不多先生」嘅態度,一定不時會發生食物中毒事件,日本人就冇呢種態度喎,肥仔K講一個故事,說明呢個道理。
肥仔K與一班來自五大洲嘅外國學生,有齊第一第二第三世界國家,晚晚在宿舍食堂一齊食飯(因每月買入食券mealticket),飯堂白飯任食,其他限量供應,但即使話係限量啫,仍然晚晚有大量剩餘。歐美非洲南美東南亞學生覺得飯堂關門之後,所有食物都會倒晒,當作垃圾處理,好嘥啫,不如一人拎一啲返宿舍房間,待刨書刨到凌晨,可以消夜吖?等到飯堂關門前五分鐘,眼見再冇學生入嚟,於是一二三,齊齊掃「貨」鬆人。點知未行返到宿舍,飯堂廚房人員分批趕出來,喝令學生交出剩餘食物,一律唔准拎返房間。學生全部「繳械」之後,眼光光睇住廚房人員將所有食物倒入垃圾袋,再丟入垃圾桶。
點解要咁嚴格呢?舍監向佢哋解釋,飯堂遵守衞生準則,食物決不留過夜,晚晚清除,決不離開飯堂,以免學生因種種理由,在宿舍內吃過之後,發生食物中毒!好多亞非拉學生覺得日本人浪費,實則日本人重視衞生安全也。