恒指散番178點，升幅5大嘅窩輪，全部係公司輪，升5%都可以打入5大。藍籌備兌輪，無論係認購或認沽，冇隻上榜。
跌輪中，和黃認購輪1740居首位，跌去41%，得番1仙，暫時冇得再跌。
和黃（013）只係唔見1元，1740就直跌到最低價。和黃就算唔跌，1740都要散，理由係太過價外。
1740過去幾個禮拜嘅變化，顯示有啲窩輪炒三朝兩日可以，揸三兩個禮拜就輸乾輸淨。
上月13日，1740最高造10仙，當日和黃最高78元。和黃昨日仍有77.75元，但隻輪得番1成；當時隻輪嘅溢價18.7%。愈近到期日，愈要下跌，理由係生存機會（正股高過行使價91.61元嘅機會愈加渺茫）愈嚟愈低。

1715行1740舊路
另1隻好快行上1740舊路嘅藍籌輪，係中移動認購輪1715。
1715下月底夠鐘，行使價34.20元。正股升唔上呢個價，1715作廢；正股要升到36.10元以上，隻輪先值19仙現價，機會有幾大？