鄭欣宜噚晚以濃妝配合新歌造型，出席一個喺旺角舉行的「數碼共融」，欣宜話基本IT嘢佢都識，但唔係好叻。問佢會唔會識番個IT男友？佢話冇所謂：「有都OK，有乜事有人識整。」

問佢以前有冇擔心過唔識收藏相片？佢話唔擔心：「登過晒冇嘢驚。（同男友親密相？）已經登過晒，冇嘢驚，可放馬過來。」講到父親鄭少秋主演的《大時代》重播後勁hit？欣宜話未有機會睇到：「自己時間好緊迫，都知道大家好鍾意，無論重播幾多次，都會想睇。」

問佢有冇睇過部劇？欣宜表示：「唔係成套睇晒，間唔中睇啲，好正，完全冇鄭少秋感覺，入晒落丁蟹角色，完全係兩個人，大家相信佢演角色，真係好好。唔係因為佢係我爹哋先讚。」欣宜坦言想有爹哋演戲功力，當然要尚待磨練。

有傳《大》會開拍電影版，問佢有冇興趣演一角？佢話：「我完全open，如果要我，可完全參與。（做乜角色？）可能係一個新角色，可能係丁蟹好多年後多咗個女呢。」