當年今日

股海實戰錄:大市轉淡 提高警覺

蘋果日報 2002/05/30 00:00


美股周二復市繼續跌,杜指跌122點,1萬點亦失守,多個藉口俾淡友質低期指結算,恒指午市跟隨期指急跌,收11430,跌150點。
恒指走勢進一步轉淡,250日線目前喺11376,配合其他技術指標嚟睇,失守機會唔細,所以唔值得博反彈,除非有特別利好消息出現,否則就算有反彈,上面關卡重重,回頭再跌穿機會相當大,目前較實在嘅支持位喺11000附近,呢排不妨專心去睇波,靜待港股完成調整。

有機下試11200-11000
趙飛雲自己雖然唔太鍾意造淡,但順勢而行係正確策略。恒指短期跌近250日線可能先反彈,第一個阻力裂口底部11500,第2個阻力位係5月橫行區底部11600,第3個阻力位20日線(現處11708),如見恒指反彈之後,無力破關回頭,將係買入恒指Put輪9049嘅機會,因為恒指若回頭跌破250日線,下試11200至11000機會相當大,可在上述區域伺機獲利。
港股轉弱,但二三線股仍有個別炒得不亦樂乎,似乎唔受恒指轉弱影響。不過,大市氣氛唔好,無論炒乜股,都應提高警覺,特別係二三線股,一旦回落,會跌到你唔信。
趙飛雲