港股噚日先升後跌，恒指走勢冇起色，不過中資股向好，不受國內股市大跌影響，個市氣氛感覺好番啲。
趙飛雲噚日心情靚，上星期六推介嘅中航興業（1110）及噚日推介嘅香港興業（480）都逆市造好，早市分別喺2.05元及1.32元買入3萬股。此外倉內兩隻股都有啲起色。
中航興業上升除咗港龍業績帶動外，相信亦和中國民航局建議放寬外資持有國內航空公司股權由35%增至49%有關，此外內地航空業重組將展開，亦可舊聞新炒。中航興業尾段買盤不俗，短期守穩1.31元之上，將反覆上試近期高位1.42元。隻股較宜短炒，轉身要快。

興業破2.25元加注
至於買入興業只係到價收集，估計股價短期會喺2至2.25元水平窄幅上落，短炒水位唔太多，有利好消息配合則例外，短炒不宜，只宜中線收集。以升破50日線2.25元為初步轉勢訊號，破位可加注。