當年今日

701收料站:神州醫療真好彩

蘋果日報 2002/08/02 00:00


唔知各位重記唔記得,早排小初講過神州醫療(8186)想炒,真係估唔到,當大家關注細價股風波之時,原來炒家已經不知不覺地完成任務。經紀陳話,相信隻股稍後會靜一排。
神州醫療股價由50仙水平,湧到上去最高66仙,好彩隻股在除牌建議觸發仙股股災前配咗股,股份成功落入一班芬佬手上,任務大功告成。
神州醫療以先舊後新方式,每股57仙,配售3500萬股,集資1995萬元。睇番呢個配售價,真係算飲得杯落。經紀陳話,由於接貨班芬佬唔係炒鬼,所以千祈唔好亂諗。
另外,股價一直長升長有嘅耀生行(290),被證監會揭出底牌,股份原來由幾條友揸晒,噚日復牌後急跌。經紀陳話,隻股長升唔跌自有原因,估計幕後人稍後會補鑊力頂,皆因股價直插牽連好大,但咁樣唔代表散戶可以亂掂。
慕容小初