政協委員劉迺強寫文章呼籲市民除口罩，唔使再戴；同一日（五月六日），民意調查顯示七成市民反對除口罩。印象之中，香港人以前從來唔戴口罩，亞洲城市之中只有東京市民先至有戴口罩習慣（主要係防止自己傷風菌或咳嗽傳染他人）。但沙士降臨之後，香港人生活在恐懼中，目前仍未克服恐懼心理。

讀者署名Liao（廖先生）送來兩篇英文講「戴口罩之辯」，係佢哋一班朋友不斷討論嘅結晶，請左丁山引用。如果冇記錯，廖先生係哈佛大學博士，著名電子科學家兼實業家，佢嘅意見值得尊重，因原文甚長，姑且試譯幾個要點：
（一）世衞組織與美國傳染病控制中心發出清晰指示，沙士病人要戴口罩，但冇指示大眾市民戴口罩。根據已知事實，沙士係透過緊密接觸傳染嘅，並非透過空氣傳播。戴口罩不表示更加安全，唔戴口罩不表示風險更高。
（二）大部份人士唔知道點樣正確地戴口罩，有人重複使用同一口罩，更多人隨意丟棄口罩，呢啲行為對自己及對他人嘅健康構成風險。
（三）即使寧可信其有，多戴無妨，戴口罩會產生整個城市嘅形象問題、機會成本問題，是否值得？
（四）在已知嘅好多個案中，染上沙士嘅病人，即使一路戴住口罩，仍然阻止唔到中招！以上意見，請大家參考。