任賢齊（小齊）為咗佢月中嘅紅館個唱，噚日去咗銅鑼灣StudioWorkshop&Cafe嘅排舞室，同MaggieQ排舞，原來小齊今次邀請咗MaggieQ做佢新歌《美麗的壞女人》嘅舞伴。
任賢齊會同MaggieQ喺個唱跳一part貼身舞，到時MaggieQ重會用眼神挑逗小齊㖭！問小齊怕唔怕俾MaggieQ挑逗到？佢話：「唔會啦，係感覺啫！又唔係真嘅。」

夾腳護下體
小齊將會喺演唱會度玩笨豬跳，佢一向都好鍾意喺台上跳跳紮，問佢有冇諗過戴護陰罩，免得好似陳奕迅咁整傷下體？小齊即刻大叫：「點解要戴？戴咗好唔方便㗎，我會小心啲，至多我夾住嚟行囉！」小齊重隨即擺咗一個夾腳甫士。

千嬅Sammi演技各有所長
林超榮（超人）同毛舜筠前晚主持有線節目《娛樂熱賣大戲候》時，講起鄭秀文（Sammi）同楊千嬅呢兩個當時得令嘅女演員。
毛舜筠喺節目裏面講，話覺得Sammi嘅演技有深度啲，而超人就話千嬅就似周星馳初出道咁，無論佢做乜嘢，啲觀眾都笑定先。超人重話Sammi同千嬅都擅長演辦公室女郎嘅角色，Sammi就專做主管，而千嬅就似接待員多啲。