當年今日

股海實戰錄:匯豐似無力再上

蘋果日報 2002/08/02 00:00


美股技術指標發出轉勢訊號後,杜指走勢確係強到你唔信,美國周二及周三公布嘅經濟數據相當差,但杜指依然企硬,周三晚杜指在先跌200點嘅情況下,最後倒升56點,真係唔到你唔服!
杜指日線圖以旗形整固,會唔會再出現第3支大陽燭大升呢?雖然機會唔係好大,但亦非絕對冇可能。相對於杜指,恒指個勢就差好多,噚日早市雖一度升近20日線(現處10360),但午市就完全走晒樣,主要受期指低水拖累,最後跌87點,收10180。

89.25元阻力大
滙豐(005)早市相當硬淨,高見89.25元,但午市東亞(023)公布完業績後,就俾人借勢質落,最後收87.50元。滙豐下周一公布中期業績,可能要睇埋佢嘅成績表,大市先會有較明朗走勢。滙豐過去3日一直受制於89.25元,噚日補回周二嘅上升裂口87元至87.75元,如再補埋周一裂口85元至85.50元,則走勢可能逆轉,會再下試近期84元底部支持。如出現以上走勢,可小注買番啲滙豐Put輪,如果滙豐掉頭再度尋底,相信港股亦會跟隨。
美股呢兩日相信會有突破性走勢,如掉頭回落,港股更加冇運行,噚日期指轉淡,唔排除啟示港股轉弱。
趙飛雲