當年今日

梁海平職業拳手開私家偵探社專查港人大陸包二奶

蘋果日報 2002/06/04 00:00


職業拳手同私家偵探有何關連?梁海平覺得兩者都需要付出耐力和自信,由拳手轉做私家偵探,他覺得這份工作既沉悶又不刺激,調查的都是男女感情事,並不像電視劇內的私家偵探般,既好玩又有趣,偷拍、偷聽、偽裝、查大案,就像福爾摩斯般受人崇拜。當了十幾年私家偵探,看多了別人夫妻間的問題,尤其是近幾年在內地的「包二奶」情況,梁海平覺得有時是做太太的教精老公如何偷食。

記者:馮淑玲 
攝影:陳智良
(部份圖片由被訪者及港台提供)
幫人捉姦
八成查「包二奶」
隨着港人北上創業和工作,衍生了不少社會問題,十年前,在客人要求下,梁海平開始往內地從事私家偵探工作,發現「包二奶」情況嚴重,現時他處理八成的案件都與「包二奶」有關。
「始終兩夫妻分隔兩地,無論個男人喺上邊工作應酬,或者自己出外吃飯,總之去到任何場所,嗰度嘅女人都會主動走過來,無辦法避,上面嘅女人實在太多,乜嘢場合都有。有好多又靚又後生,除非個老婆杜絕晒,唔畀老公上去工作,否則要搵食,無辦法,唔能夠兩全其美。」
大婆二奶住同廈
經常處理「包二奶」案件,梁海平看盡男人瞞着老婆偷食的各式各樣伎倆。「試過有單Case,老婆懷疑老公偷食,搵我哋去查。但跟咗好耐都無發現,老公喺外面嘅舉動好正常,但老婆就成日話老公夜返,有次明明見到個男人六點返屋企,但女嘅就話八點至到,後來被我哋發現男嘅喺自己住嘅大廈內,不同層數不同單位,收埋咗個女人,佢每日返屋企,原來係先去二奶處,咁我哋通常唔會跟個目標返到屋企,所以咪一直無發覺有蹺蹊。」
老婆教精老公偷食
男人瞞着老婆偷食的伎倆如此精明,梁海平覺得是老婆教精老公。「其實,女人好細心,始終兩個人生活咁耐,從平時嘅動作同態度,一定會發覺對方有唔妥。但老婆衰在感覺到少少嘢就忍唔住口,問老公有冇咁嘅事,個男嘅知道自己被老婆懷疑,咪想辦法隱瞞。咁你愈問,佢咪愈多辦法瞞。最後你根本問唔到嘢,所以話男人唔係精明或者蠱惑,而係老婆教精佢哋。若然真係發現自己老公有問題,做老婆應該不動聲色,沉住度氣,搵人去查佢,咁先可以搵到證據,同佢當面對質。」
看慣情事疼錫太太
經常處理偷食案件,梁海平慨歎男女一起,總有問題發生,尤其是現今社會開放,多了女性出外工作,這類案件比例較多。「個客發現自己老公包二奶,都會好激動,我哋會叫佢冷靜,有客試過自殺。至於話我哋係幫人,抑或加快人哋婚姻破裂?其實,老婆上嚟搵得我哋,問題早已存在,我哋只不過幫佢搵證據,等佢哋兩個可以早日面對同解決問題。否則成日疑神疑鬼,嗌交冷戰,重衰。事實上,我哋唔少客最後都冇同老公離婚。」
看多了感情事,梁海平亦特別珍惜與太太的婚姻關係。「唔會特別錫太太,但會盡量令自己清醒,避免有第三者出現。有時少啲嘈交,我通常都做唔出聲嗰個。」
大陸查案困難多
地理環境難應付
梁海平現時經常要返內地查案,他聘用了十多名港人幫忙,他始終覺得本港較內地人可靠,但內地的地理環境卻是最難應付的。「內地幅員大,對我哋嚟講,唔熟環境,不似香港咁,所以上去做嘢都幾麻煩。」
他曾與同事晚上到東莞郊區監視目標,四野無人,都幾危險。「我哋坐電單車去目標間廠,要通過個荔技林,見唔到個天,全部被荔枝樹遮住。佢間廠周圍有圍牆圍住,淨係睇到二樓嘅窗,周圍都無人,好靜好荒蕪,我哋走到間廠對面,上咗間起緊嘅屋裏面做監視,到深夜自己行出大馬路截車,都幾慘。」
內地禁止私家偵探
梁海平面對的另一困難,是內地不容許私家偵探這行業,很多私家偵探都以「諮詢公司」或「私人調查」來掩飾身份。「以前,喺上海同福建,有當地人開私家偵探社,但佢哋好多係退休公安,中央擔心外國人利用呢啲公司從事敏感工作,於是全面禁止,所以好多人惟有易名嚟做。但我哋上去唔擔心,因為我哋做嘅時候,唔會俾人知道,只有我哋自己知道,就算喺目標面前影咗佢相,佢都唔知。」
學拳如偵探
自信鬥志好重要
梁海平話自己可以做了十多年私家偵探,全憑自信和鬥心強,這些是他從小學打拳學回來的。「我11歲開始練拳,開始時學合氣道同國術,17歲開始比賽,學泰拳、自由搏擊,到28歲唔打得,咁有朋友做緊私家偵探,問我要唔要加入,咪試吓,一做就十幾年。其實,做私家偵探同打拳一樣,都好講自信心,鬥心要強,個人要冷靜,因為我哋要花好長時間同精力來查案,有時要學會靜觀目標嘅變化,隨機應變,又要有耐性,有信心,唔怕困難,一定要將案查到為止。」

壓力大生活沉悶
偷拍、偷聽、跟蹤,全是私家偵探的指定工作,加上電視劇電影渲染,很多人覺得私家偵探工作刺激緊張又有趣,但梁海平卻不認同。「我成日同人講,我哋呢行又悶,又唔刺激,亦唔神秘,無甚麼特別,人一個,經常要長時間監視目標,有時十幾個鐘,壓力又大,又怕跟漏,而且唔似差佬咁,我哋無權無資源,同劇集完全不同,所以好多人抱住憧憬入行,做唔夠兩日,就唔做,因為頂唔順。」
梁海平小檔案
姓名: 梁海平
年齡: 44歲
婚姻狀況: 已婚
學歷: 中學畢業
經歷:
1969年學習武術
1975年參加西洋拳及國術擂台比賽
1983年在日本沖繩島舉行的亞洲拳擊賽奪得銅牌(54公斤級),其後參加自由搏擊比賽,出戰17場,13場勝1和3敗
1986年與朋友合作,轉做私家偵探
經典賽事: 1983年6月27日,與日本踢拳道冠軍得辰男比賽5回合,成功打敗對手。
電視有得睇
梁海平的故事將於6月14日(星期五),在港台電視部製作的《連營珠三角》內播出,劇名為《都市隱形人》。《連營珠三角》是講述十二位從事不同行業的港人,在珠三角發展的故事,該節目逢星期五晚上7時正於亞視本港台播映,並於港台網頁(www.rthk.org.hk) 視像直播及重溫。