去中去殖 - 左丁山

蘋果日報 2015/10/01 00:00


在馬場遇到M女士,見佢行路要用拐杖,與平時健步如飛嘅姿態,大大不同,問佢為何如此,佢話前星期在威靈頓街踩空梯級,跌在地上,傷了腳踭,唯有嘆一聲倒霉。威靈頓街乃是穿高跟鞋女士之陷阱,由德己立街行上擺花街係上斜,每行幾步就有樓梯級,過咗擺花街行落閣麟街就係落斜,大把梯級等住你,如男士女士,不論年紀,一路行一路睇手機的話,隨時會仆親。
唔係陶傑講起,自己平時都唔覺,昔日港英街道取名,確有一套,例如威靈頓街一帶附近之士丹利街,荷李活道,士丹頓街,伊利近街,閣麟街,亞畢諾道,雲咸街,德己立街,皇后大道中,德輔道中,干諾道中等等,都係英國名字,如果要去殖化,另改名字,都幾麻煩,香港無人民路,解放路,中山路,確係唔似中國城市嘅。
追月之夜,遇到一班年輕人,其中一位係今年考入政府做官嘅(專業職級),佢問左丁山:「點解一啲老人家到咗天安門睇閱兵,會淚流滿面?」左丁山答:「最簡單咁講,阿爺統戰成功。」點知呢位年輕官員再問:「乜嘢叫做統戰呀?唔識噃。」哦,統戰都唔識,再講落去1950至1970年嘅香港難民故事,佢一啲都唔知,佢嘅「去中化」實在幾徹底,特區政府之最年輕官員唔識中華人民共和國之革命史實,只識在蘭桂坊、蘇豪區夜蒲,講英文,食西餐,確令向中央交心之最高領導頭痛不已,領導人或會下令教育局加強歷史教育都唔定。唉,推動廢除中國歷史科嘅,咪係羅范椒芬囉,解鈴還須繫鈴人,搵番羅范出嚟管教育再改革就啱嘞。
呢位年輕官員係讀文學院畢業嘅,對當代中國史及1970年之前香港認識之淺,令人吃驚,但為人醒目到極,做事有拼勁,英文好,肯捱,考到政府官職係有理由嘅,但他日升上去做高官,好明顯缺乏歷史感與歷史修養,唔知公務員事務局有無訓練課程俾佢哋呢一輩年輕官員修讀,或者只係送佢哋到北大清華接受強世功嗰套中共歷史觀洗腦呢?唔好話「洗腦」講得過份咗,以左丁山所見所聞,香港有不少精英,特別係番書仔回流精英,對香港及中國歷史認知貧乏,受統戰上京,見到文物之精美,現代解放軍之軍器精良,操兵聲威蓋世,就好容易心情激動,見到升旗奏國歌就流下眼淚,讓陶傑一輩看在眼裏笑在心裏!此類精英梗係比較容易「受洗」啦。