街市巡場：
荃灣香車街街市 海參國際化
將近新年，係時候辦年貨啦！鮑參翅肚係新春幾乎會食到嘅指定菜式。今日小記要帶大家行嘅係荃灣香車街街市，佢係一個歷史比較耐嘅屋邨舊街市，至少超過三十年，買嘢嘅人有屋邨舊街坊及住喺愉景新城嘅新客。今日要講嘅係街市裏面有個老字號雜貨舖，賣嘅海參超過七種以上，有大細Size，平貴都有，總之必有一款啱大家。另外更發現有兩個筍舖，分別有海魚及農村種嘅蔬菜賣㖭！
記者：陳冰麗 攝影：關文慧
過年必備鮑參翅
文記以出售乾貨海味為主，喺呢個街市經營超過二十年以上，到此買嘢嘅街坊同檔主鄧伯伯都好相熟。近新年，文記以出售海參最多，其中包括有豬婆參、刺參、禿參，來源地包括有印尼、墨西哥、非洲、澳洲等，可謂非常國際化。
另外，由於日圓貶值，高質素嘅日本魚翅價格都有下調嘅趨勢，呢排平咗一、兩成。還有品質好嘅日本乾鮑仔都非常抵食。
禿參外形偏圓，體形亦唔大，種類最多，中等價錢。
豬婆參又叫白石參，體形較大，每斤通常有2-3件，一斤大概可發至5斤左右，係最抵食嘅一種。
刺參又叫遼參，係最貴嘅一種，但質素亦係最正嘅，刺參皮薄，身體背面布滿圓錐形肉刺。
天未光出海 中午前沽清
喺香車街街市附近屋邨住嘅梁太極力推介呢個海鮮檔口，喺處幫襯咗十幾年，梁太話：「呢個檔口主要賣海魚，啲魚零舍新鮮好味，無泥味。」檔主鄧生天未光就要出海攞魚，每朝早大概七點零就開檔，每日所賣嘅海魚不定律，視乎當日之收穫，所以數量唔多，賣完即止。除咗新鮮海魚，呢處亦有冰鮮魚，但同樣係鹹水魚。梁太提醒大家愈早去至容買到靚魚，一到十一點，幾乎所有魚都沽清，而下午檔主係唔開檔㗎！
順利魚枱(5號舖)
自種蔬菜 價高仍受歡迎
呢個菜檔檔主因為身形較健碩，街坊索性叫佢做肥仔。呢個菜檔選擇雖然少，只有四、五種蔬菜，但賣嘅全部都係取自元朗及大嶼山川龍居民以天然肥所種植嘅蔬菜。梁太另一推介就係呢個菜檔，佢話：「啲菜無農藥，比平時食嘅蔬菜為甜，特別係西洋菜，菜味濃郁，食落又嫩口啲。」
肥仔菜檔(115號舖)