藥王Y話畀左丁山聽：「你有所不知，我哋全部賣正貨，批發商要畀晒原廠生產證明文件我哋睇，我哋驗過貨，先至肯買。內地遊客幫襯我哋一定買到真貨，如假包換。遊客對上海北京等大城市藥店反而冇咁大信心也。譬如冬蟲草，我哋曾經用金屬探測器去仄，睇吓內裏有冇藏咗鉛塊、鐵條，呢啲嘢係用嚟呃秤嘅，而且鉛塊對人體有害，冬蟲草用嚟補身補氣，竟然含鉛嘅話，你話幾陰功？仄得多，奸人無所遁形，於是啲蠱惑仔又在冬蟲草內藏竹塊、草根，逃避金屬探測器。我哋發覺被搵笨之後，𠵱家先探測，後抽樣切開，用人手搜查冬蟲草內嘅垃圾。賣大陸藥，唔係咁容易做㗎！」
聽到左丁山眼定定，冬蟲草都可以落鉛，唔怪得內地有奸人用頭髮整豉油，香港人去深圳買年糕亦竟然買到假年糕。唉吔，左丁山份人比較保守，買中成藥都係幫襯香港啲名店好過，但香港須慎防內地賣假藥之風流入本港，自毀長城。