當年憑整齊齊蔭頭，靠清純路線成功闖出名堂嘅「邦民女」陳嘉寶(Anjaylia)，近期事業、愛情兩得意，唔止有新劇拍，而且戀上喺金融界做嘢嘅E先生，每次提起男友總面露甜笑。

今日就有雜誌報道，原來呢位被Anjay叫做「E先生」嘅男士，叫做EpaphrasWong，現年32歲。做得女神嘅男友，屋企當然有番咁上下，據雜誌所講，佢家族至少擁有7個物業嘅。

報道指E先生曾經年少輕狂，試過刑事恐嚇、不小心駕駛以及盜竊等罪名，不過後來佢已經重新做人，佢就話係因為入咗教會做咗基督徒，而令佢有所改變，之後仲因為咁識埋Anjay添！

兩人其實只係拍拖幾個月，今次仲係Anjay初戀添，Anjay接受雜誌訪問時表示，佢同男友都係虔誠基督徒，兩人喺教會認識，理念想法都好一致。之後Anjay再補充：「拍咗唔係好耐咋，基督徒可以錫，唔會婚前性行為，正常拍拖情侶會做嘅動作，拖手咁梗係會拖啦！」