當年今日

股海實戰錄:江西銅有炒上藉口

蘋果日報 2002/01/14 00:00


趙飛雲上個禮拜提過美國官方對經濟前景不如市場般樂觀,格老禮拜五晚發表演說亦是如此,對經濟前景抱審慎態度,影響杜指再跌80點,1萬點關口失守,收9987。杜指50日線目前喺9877,須昅住會否跌穿,因對港股後市有重大影響。
美股現水平已係炒緊經濟復甦,若果美國經濟未能如市場預期喺第2季開始復甦,美股會好唔掂,呢點係入市者必須留意。港股上周五跌破50日線,加上美股上周五跌破1萬點關口,相信技術性沽盤會湧現推低恒指,恒指萬一點危危乎。
雖然中移動(941)有「補飛」言論,話兩個新流動電話牌照要喺兩年後先至發出,但相信沖喜作用唔大,因為中移動及聯通(762)現價唔算平,未必吸引到買盤博反彈,而滙豐(005)近期負面消息多,能夠喺現水平企穩已算好叻。

短炒0.95元止蝕
不過大市雖然偏淡,若要短炒可留意江西銅(358)。隻股上個禮拜尾公布與多間外國企業簽署4.5億美元合作協議,而剛上市嘅A股大幅飆升1倍,或會帶動H股造好,可留意走勢,短炒以0.95元止蝕。