舒密加衝線無揮旗
求驗客手記:比利吹水忘晒形

蘋果日報 2002/04/02 00:00


前巴西球王比利禮拜日喺巴西進行嘅一級方程式賽車,俾大會請嚟負責搖支格仔旗,點知好衰唔衰,喺舒密加衝線嗰刻,佢慒然不知乜都冇做過。
比利事後解釋自己因為睇唔到舒密加衝線,所以先至冇喺對方衝線嗰陣搖旗,但攝影機就影倒佢掛住同身後面嘅人吹緊水忘晒形。鬼咩,比利佢近排鬼死咁忙,周不時要飛嚟飛去出席商業應酬,又話邊隊可以捧世盃,邊隊又有機會入次圈,可能係吹水吹上癮,先至搞出今次笑話。比利連旗都唔識舉,唔怪得之某間藥廠會搵佢做代言人啦!

韋伯女友面前威威
韋伯嘅新女友賓絲噚日千里迢迢陪住佢到亞特蘭大打波,呢鋪「韋哥」喺女友面前梗係唔衰得,點知鷹隊個助教即前NBA茅王麥漢喺比賽時重勁寸「韋哥」:「帝王可能贏到今季冠軍,但呢場波肯定輸硬。」激到「韋哥」更加搏晒命,結果帝王最後以一分險勝,呢鋪麥漢真係衰多口。

NBA東岸亂世佳人
東岸呢排真係亂過亂世佳人,以為冇咗卡達嘅速龍肯定輸到一仆一碌,點鬼知佢哋重勁揪,連贏咗成五場,而冇幾耐之前重係東岸二哥嘅公鹿呢排竟然輸到連阿媽都唔認得,喺過去十二場波輸足九場,搞到𠵱家跌到第六位,如果佢哋重唔快啲「止瀉」,隨時俾後上嘅黑馬踢出季後賽,常規賽末段爭出線認真好睇!
波神控衞被譯小前鋒
噚日巫師輸波後波神佐敦大發牢騷,指教練哥連斯如果畀佢打番「PointGuard」,佢哋就唔使輸波。點知X浪網,噚日竟然大字標題話「“我本該打小前鋒的位置”喬丹對失利頗有微詞」。大佬啊人哋波神話想打「PointGuard」(控球後衞)唔喺「SmallForward」(小前鋒),連啲咁鬼簡單嘅英文都譯錯,不如先去問吓劉家傑先啦!

大比數梳打埠通殺
呢排啲波好興大手交易,上星期五紐記就大炒愛華頓六比二,前日維拉利爾亦大勝畢爾包五比二,買咗上盤嘅朋友自然分到笑,不過「梳打埠」推出嘅波膽之中,只有淨勝五球或以上呢一欄,即係話如果場波嘅比數超過四比四而又唔係淨勝五球或以上,「梳打埠」就會「通殺」,如果有興趣專攻大比數波膽嘅球迷,睇嚟要向英美嘅博彩公司埋手。