成龍鍾意扮大哥個個都知，最近仲有報道話龍之子房祖名都有扮大哥嘅傾向，開始變得沙塵白霍，係真係假將來自有分曉。不過一直低調嘅龍嫂林鳳嬌，原來都有多少阿嫂風範。
日前馮仁昭就喺銅鑼灣撞見林鳳嬌，當時佢連行帶跑衝上崇光百貨二樓嘅日本女裝品牌ICB專櫃，女店員一見龍嫂出現，即時不敢怠慢，仲幫佢捧住一大堆已經揀好嘅衫，畀龍嫂入試身室慢慢試。20分鐘後，龍嫂試衫完畢兼揀啱心水，同店員交帶好送貨事宜就走先。

兩名職員護駕

跟住龍嫂去到附近嘅滙豐銀行，當時係下晝6點半，銀行已經收晒，但龍嫂就獲優待入去，兩位銀行職員仲特登企喺門口恭候大駕，四萬咁口對龍嫂殷勤招呼。
現場見龍嫂又拎文件又打電話，好鬼忙碌，冇耐仲跟職員入房辦理財務手續，搞足大半個鐘至走，再行去百德新街上成龍保母車鬆人。
龍嫂買衫有專人接待兼送貨，連銀行都特別為佢延長服務時間，只招呼佢一個，龍嫂嘅派頭同江湖地位，不言而喻喇啩？