昨日行家傳出，超人李嘉誠媳婦王富信入養和醫院待產，吸引成班記者喺養和守候，而小超人李澤鉅昨日出席香港總商會講座，唔少行家都問佢對樓市嘅睇法之餘，當然問埋第三代超人面世未。將再為人父嘅李澤鉅笑笑口話，「唔係今日。」（咁幾時呀？）「唔話你聽。」
可能碰啱放工時間，小超話走話走，但座駕就等極都未到，喺三十幾度高溫下，佢熱到要除低件西裝褸，不過就造就機會畀記者，問吓超人第三代的最新情況。
另外，佢細佬李澤楷嘅電盈，新請嘅JackSo（蘇澤光）噚日第一日返工。不過，李澤楷就唔喺香港，又無交帶要佢做啲乜，睇嚟真係全部嘢都放晒手比JackSo搞。蘭西有位同事，噚日去上海出差，喺虹橋機場等緊車嗰陣，就見到小小超行色匆匆，好自然走上前同想打個招呼。不過，小小超就一個箭步上咗車，搞到個同事無機會關心吓佢嘅近況。

利記贏銷售獎袋四十萬
樓盤賣得好，經紀功不可沒，所以發展商周不時都會設獎金鼓勵，等佢哋有短期目標，落力促銷。將軍澳中心近排舉行嘅代理銷售大賽，四十萬獎金就由利嘉閣奪得。
利記區域經理楊淑美話，佢哋只係用咗十幾日，已經達到發展商設定促銷二十個單位嘅目標。四十萬獎金，就按比例分畀做成交易嘅同事，佢話有位同事成到六宗之多，份獎金都幾和味，所謂多勞多得就係咁解啦。