盈富基金（2800）新一季發售額定為60億元，雖然較首季上升1倍，但不足以吸引外資大手沽空，然後喺低位吸納盈富補倉。大市成交薄弱，要將大市質低絕對唔難，不過現時市況缺乏方向，相信後市都係窄幅上落居多。
萬信集團（555）噚日停牌，因為可能涉及控制權易手。ｉ師傅話，大股東可能賣盤畀鼎康御泰，據聞每股作價0.40元，比停牌前有溢價9.6%。現時證券業難撈，收購合併係大勢所趨，如果證券公司只靠做證券經紀業務，基本係冇前途可言，可以合併已經係好事，結業收場咪重慘。

意科投降者眾
噚日意科控股（943）大跌44％，收報0.43元，成個斬倉格局咁款。不過成交只得413萬元，話多唔多，話少唔少。Cookie話，噚日冇斬倉行動，不過股價由2.80元水平跌至前日0.73元，唔少投機者已經投降，冇人肯接貨，所以少少沽盤都可以質到股價大幅下跌，咁樣跌勢，股價隨時會見0.20元。
另外，數字地球（109）大跌36％，收1.9仙。呢隻股就有少少斬倉迹象，但低位有莊家牌入市接貨，睇落幕後人士重有唔錯實力，後市可能會急速反彈。
國中控股（202）委任許浩明為副主席，並委任李鵬飛及現任上海證券交易所副理事長吳偉驄為獨立非執行董事。黑客話，國中請埋咁多大卡士人物，後市估計會有料到，否則點會咁重本？不過，噚日則見申銀萬國仍在壓價收集。