全城狂追劇集《溏心風暴》，一到夜晚9點半，就黐住個電視唔肯走。成日睇住鮑魚海味，心癢癢想食。不過要煮鮑魚又真係太煩，買隻亁鮑返屋企又要曬又要等，曬好又要發，閒閒哋搞三五七日。好在有罐頭鮑，即開即食唔使等，價錢又平，但鹹味較重，煮嗰陣記得落些少糖呀！

記者：梁學文　
攝影：譚盈傑

鮑魚炒野菌

需時：20分鐘　
價錢：$40/4人份

材料：罐頭鮑魚2隻（切粒）、唐芹4両、冬菇2両、鮑魚菇2両、秀珍菇2両、蠔油2茶匙、生粉2茶匙、水1/4杯、紹酒1/4杯、鹽/糖各1茶匙、蒜茸2茶匙、葱1條（切碎）

做法：起油鑊將3種菇炒至8成熟撈起備用。用1茶匙蠔油/生粉/1/4杯水煮鮑魚幾分鐘。用蒜茸/葱起鑊，加入所有材料/鹽/糖略兜，最後加剩餘的蠔油/紹酒兜勻便可。

番茄鮑魚豆腐湯

需時：15分鐘（未計煲湯時間）
價錢：$60/4人份

材料：罐頭鮑魚2隻（切片）、番茄1個（切粒）、豆腐1磚（切粒）、草菇4両、大眼雞1條（煎香備用）、薑1粒、水6碗

調味：鹽/糖各1/2茶匙

做法：先將草菇、豆腐、番茄汆水，然後加入已煎香的大眼雞/鮑魚，再加入6碗水/薑，煲2小時後加調味即成。

鮑魚小海皇

需時：20分鐘　
價錢：$40/4人份

材料：罐頭鮑魚2隻（切片）、蝦亁2両、帶子2両、黃瓜4両（切片）、辣椒少許、蒜茸2茶匙、麻辣醬2茶匙、鹽/糖各1茶匙、蠔油2湯匙

做法：先將鮑魚、蝦亁、帶子汆水撈起備用，加入1/2茶匙鹽/糖煮熟黃瓜。用蒜茸/麻辣醬/辣椒起鑊，將所有材料落鑊兜勻，再加蠔油、1/2茶匙鹽/糖炒至亁身即成。

蒜茸鮑魚蒸勝瓜

需時：20分鐘
價錢：$40/4人份

材料：罐頭鮑魚2隻（切片）、勝瓜2條（切件）

蒜茸醬：鹽/糖各1茶匙、蒜茸3湯匙，攪勻後炒熟備用。

做法：勝瓜切件後，將鮑魚/蒜茸醬放上面，然後隔水蒸約6分鐘即成。

罐頭鮑點煮？

罐頭鮑一買返屋企就食得，如果嫌唔夠腍，最好喺煮之前用熱水或上湯煮一煮，或者隔水蒸多1個鐘。

點揀？

南非約$250/12頭
南非鮑魚鮑魚味重啲，唔係太鹹。

日本約$350/12頭
日本鮑魚夠大隻，口感比較好，價錢亦較高。

澳洲約$200/12頭
澳洲鮑魚鹹味較重，煮的時候要注意調味。

注意事項：

1.罐頭鮑唔同亁鮑，12頭係指1罐入面有12隻鮑魚。

2.揀罐頭鮑魚無得睇真身，所以最好揀買大牌子，好似鑽石牌屬較有口碑的品牌。

示範：周記避風塘朱師傅