短線遊：
金夫人馳馬徑睇罕見植物俯瞰香港仔
蘋果日報 2004/05/31 08:00
南風道下車，一行人展開旅程，由於南風道正進行斜坡維修工程，金夫人馳馬徑入口隱藏喺地盤裏面，要行到地盤盡頭先搵到入口。領隊呂Sir先解釋馳馬徑由來：「話說港督金文泰個老婆好鍾意遊山玩水，所以就喺香港仔山區闢咗條馳馬徑，等夫人可以得閒騎吓馬仔。」馳馬徑沿途有唔少植物，當中不乏市區罕見品種，路段易行，全程4小時，絕對適合一家大細郊遊玩樂。
觀察沿途植物時，緊記要小心步行，因部份路段「前路不通」，要格外留神，猶幸有明確路標，只要跟住路標行，理論上就一定唔會迷路，不過部份引水道旁路面正進行維修，行經時亦要加倍小心。
引水道旁一樣有唔少植物，陪伴你完成旅程，當中包括龜苓膏材料之一嘅土伏苓、別致可愛嘅滿天星，若你對植物生態感興趣，馳馬徑一定啱你行。
出發當日落微微細雨，雖然路面鋪滿泥濘，但一行人依然雄心壯志進發，經引水道前行，原本茂密樹林突然消失，一望空闊，香港仔、鴨脷洲、海洋公園景致盡收眼底，Gillian同Yuki駐足欣賞，小休停留，影夠沙龍至肯走！
再前行，出現正式觀景台，觀景台上有塊鐵牌，教你欣賞香港仔避風塘、廉租屋同天主教書院等絕靚景色。時移世易，香港仔同鴨脷洲喺呢幾年變化甚多，比起記者兒時印象，絕對係兩回事。
經過3小時路程後，終於到達下香港仔水塘，Gillian突然問：「究竟下香港仔水塘有幾多年歷史呢？」，呂Sir答：「水塘喺1890年落成，前身係大成紙廠嘅私人水塘，隨後政府將之購入，再連同新興建嘅上香港仔水塘，組合成𠵱家統稱嘅香港仔水塘，重喺1931年由當時港督貝璐主持啟用儀式㖭！」再行就到香港仔郊野公園，內裏設有郊遊地點，行到攰不妨坐低稍事休息，然後下落香港仔，正式完成今次旅程。
去程：銅鑼灣摩頓台乘76號城巴（$5），到深水灣道南風道站下車，過對面馬路到維修斜坡地盤，行至盡頭見金夫人馳馬徑入口。
回程：沿香港仔水塘道步行至石排灣邨，乘7號城巴（$5.3），返回摩頓台。