《文匯報》引述權威人士消息（七月二十二日），指出新財政司司長一定來自商界，學者與公僕冇份，跟住列出一堆商界名人，包括馮國經、鄭維健、梁定邦（大律師）、吳光正、鄭海泉、王冬勝、黃鋼城。其中馮國經與吳光正係特首材料，屈就咗做財政司司長，假如未來四年唔覺意孭咗鑊，點算？所以此兩人唔會係熱門，馮國經據報已放風唔做㖭。銀行家之中，黃鋼城話咗No，王冬勝精過甩鞭，鄭海泉做恒生阿頭做得好舒服，兩位都唔似會「為香港犧牲」（特首話）嘅。剩下來，鄭維健、梁定邦最似樣噃，鄭維健曾為董特首競選，捱義氣做過中央政策組，特首有難之際，去再捱多一次義氣大概冇乜所謂啩？假如鄭公子唔做，梁大狀係最佳後補！

馬可斯在菲律賓掌權時代，為咗頂住國際銀行界，想搵萬國寶通（今之花旗）菲律賓行長（菲律賓人）做中央銀行行長，聽到風聲之後行長擒擒青要求紐約總部將佢調去第二個國家，情願暫時放棄菲律賓嘅優悠生活，都要暫避風頭，因為佢好唔鍾意馬可斯，唔想做佢夥計，成為銀行偽君子也。結果佢借調職為名，去國不歸，直至馬可斯下台之後，佢先至返回菲律賓，後來真係做咗中央銀行行長。相比起來，佢嘅同事阿松哥就夠偉大，俾萬國寶通調咗去新加坡，都要走返嚟香港轉去大通，然後為香港犧牲，結果真係犧牲咗㖭。