四月之時，本欄收到讀者來函，問如何找到前名采版作者「阿樂」，目的係諮詢抗癌藥方。左丁山唔知，冇得答。後來一位張讀者來信話佢以前剪存晒阿樂嘅文章，並且影印咗二十篇有關抗癌嘅稿件畀左丁山睇，可供有興趣讀者參考，茲轉告各位讀者。《蘋果》不如索性將阿樂專欄選輯有關中醫中藥嘅文字，出版單行本，應該有銷路啫。

本欄講「萬事德有工冇人做」以及「社會實況」，引來半打讀者來郵，有反應、有評論，其中一位話自己肯捱，希望可以做兼職，已經代為通知萬事德。
一位女士B小姐話忍唔住，有感而發，傾訴打工仔苦惱。B小姐本來係秘書，在九六年放棄月入過萬嘅秘書工作，加入銀行，考到證書，以後可以慢慢升上去，點知現時工作壓力大到極，個個同事驚裁員，於是覺得：「以前工作壓力大，得到嘅回報係生活漸漸改善，付出也覺有價值，自然產生動力。但現在每個人都抱住『捱』嘅心態，愈做怨氣愈大，精神像拉緊的橡筋，遇上一點挫折都很容易崩潰……傳媒找成功人士講以前的艱苦，教人努力求上進，完全不對症下藥，因為肯努力的人，像我已做到心灰，覺得自己在日以繼夜、排山倒海的工作量下已沒有了生命，如行屍走肉地為了討生活而上班。」三十零歲便如此心灰，令左丁山驚驚地，鼓吹《獅子山下》精神，原來係五十幾歲人嘅一廂情願，實際係摸唔到邊。