中環在線:李國寶唔做電盈非執董 - 李華華

蘋果日報 2018/11/16 00:00


李國寶近排諸事不順,前排東亞(023)被剔出藍籌、之後政商界好友「大Sir」鍾士元、郭炳湘、周明權等離世,要忙於出席葬禮,自己亦都犯官非。事源上個月,佢捲入馬德里國家法院就CaixaBank股權交易展開嘅刑事調查,被指控濫用市場、內幕交易、財務報表失實陳述、公司管理不善同對股東不公平待遇。調查展開咗兩星期,東亞先回應指「睇新聞先知」,傳媒更炮轟港交所監管不力。

之後多間佢有份做獨立非執董嘅公司紛紛表態,好似維他奶(345)就話李國寶受查同公司無關;大酒店(045)就指調查同集團的業務無任何關係,唔會對集團造成任何影響。而電盈(008)話就調查無任何其他資料。

噚日電盈就發公告,指李國寶決定卸任獨立非執行董事,即引起「劃清界線」疑雲,但電盈主席李澤楷不嬲同李國寶老友鬼鬼,近排先一齊出席訪京團,獲習近平接見。似乎好似公告所講,李國寶要投入更多時間處理其他業務居多。

李華華
mailto:[email protected]