曾蔭權嘅前御廚于燕平，同政府打完官司後，一路都話要爆大鑊，將服務財政司司長官邸時候嘅所見所聞寫出嚟。噔！噔！噔！噔！《驚心動魄303天──在師長官邸的日子裡》經過多番波折，終於出籠。
于師傅噚日特登開記者會介紹佢本力作，八方唔執輸，第一時間攞本書睇，見內容有好多描寫主角「曾糟財師長」如何異於常人嘅節儉生活，但對於毋須自掏腰包嘅嘢就闊佬，對員工告病假就唔認為有迫切性等等，至於其中一章《官邸來了神秘女郎》竟然開天窗，化名余不平寫呢本書嘅于師傅話，咁處理係聽咗律師意見。
八方好有興趣書中部分，話「師長」宴客菜單分好幾等，但宴請傳媒人嘅菜式永遠係最差。
八方嘅老友律師話，雖然呢本書所描述嘅人物全部用化名，又寫明故事純屬虛構，如有雷同實屬巧合，不過由於旁人一眼就知呢本書寫緊邊個，若當事人認為內容非真實並帶有貶意，可控告作者以影射手法誹謗。至於最容易被聯想人物曾蔭權，佢嘅發言人話暫時唔會有任何評論。
（圖）于燕平介紹新書時手勢多多，說到興起時更神情激動。


E-mail：[email protected]